2. Friedensordnung

Archivale

Regest: Abschrift

Diz sint diu gebot diu der Raut und diu stat hat ufgesetzet durch frides willen und durch der stat nutzes und eren willen. -
Swele ainen an sinen Hals sleht fräuellich oder in sin har grifet frävelich der sol ainen manod vor der stat sin. -
Swele zu ainem sprichet fräuenlich: / genime +) din muoter / oder ainen hunt / daz sol an den Raut stan / und wie ez der handlot / ditz sol sin. -
Swele ain messer uzzugget und ainen da mit erstehhen will / und man in dez uberzuget mit den luten / die denne die Rihter dunket / daz si dez billich helfen sulen / der sol vor der stat sin iar und tag. -
Swele aber ain messer uzzugget den man erstechen wil und sich selber damit schirmet / daz er it erslagen werde / der ist nutzit schuldig. -
Swele och zu lofet da die lute zürnent mit an ander / und sin messer zugget ane gevärde durch frides willen und schaidentz / der ist nutzit schuldig. -
Swele zu ainem sprichet frävenlich du lügest der sol ain wochun vor der stat sin. -
Swele burger oder sin sune ane den Raut messer tragent / die sulen ain wochun vor der stat sin. -
Swenne ain wirt oder sin gesinde / den Gast sin messer haisset ablegen un zu im sprichet / legent daz messer ab / tund er ez nit / so geben wir u nit essen noch drinken / tret aber der Gast daz messer un git im der wirt dar uber essen un drinken / so ist der wirt fünf schilling Haller schuldig zu gende an die stat. -
Swele karrekneht ain messer tret an dem firretag den sol man phenden umb fünf Schilling Haller. -
Swele och Rihter ist in den zünften / wa der ieman siht oder hörent sellich unzuht tuon / als da vor beschaiden ist / der sol den ze hant ungeuärlich uf den ait rügen sinem zunftmaister / oder ainem der dez Rautez ist / der sol in denne dem Raut gemainlich rügen. -
Swelem och von fintschaft wegen diu stat verbotten ist / der sol in den zehenden numer komen / ie daz er sich veriht / mit dem und sinen friunden / von dez wegen im diu stat verbotten ist. Wölt aber der selbe ze fast haben / so sol ez denne an dem Raut stan. -
und sweler gerüget wirt umb sölich unzuht daz er für die stat sol / der sol ze hant uz gan / an dem nahsten sunntag / so ez im kündet wirt und sol uzwendig dem zenhenden beliben als lange / als dike er gerüget wirt / und als dike er in den ziln / in den zehenden komt und daz in ain gezworner uz den zünften / oder uz dem Raut siht / als dike sol er buessen als von erst / im erlaubes denne der Raut / Ist aber daz in dem zenhenden dehain gescworner siht / so sol er swern zu den Hailigen daz er daz behalten hab als er billichen solt / und ze urkunde dirre vorgescribern dinge / so ist dirre brief versigelt mit der stette gemaind Insigel ze Rütlingen / der geben wart an sant Bartholomeus tag in dem iar do man zalt von Cristes geburt drüzenhundert iar dar nach in dem vierzigesten iar

Object Details

• Reference number: A 2 b (Verfassung u.a.) Nr. A 2 b (Verfassung u.a.) Nr. B 71/02
• Formal description: Beschreibstoff: Pg.
• Further information: Zeugen / Siegler / Unterschriften: Stadt Reutlingen; ; Siegel (Erhaltung): Weitgehend abgegangen; ; Bemerkungen: +) Wolfgang Jäger: Die freie Reichsstadt Reutlingen (1940): S. 110, bemerkt dazu: "Prof. Bohnenberger ist der Ansicht, daß die Stelle ursprünglich 'gewinne' hieß und von einer anderen Urkunde falsch abgeschrieben ist." -; Jedenfalls scheint es sich um Inzest und Sodomie zu handeln.; ; Literatur und Druck:; Wolfgang Jäger: Die freie Reichsstadt Reutlingen, Siedlungs- und Verfassungsgeschichte bis 1500, Würzburg 1940, S. 50 ff., 110-111; ; Genetisches Stadium: Or.; ; Verweis: jetzt: A 3 U 10

References and Relationships

• Context: Reichsstädtische Urkunden und Akten (Bde. 7 u. 20) >> Bd. 7 Friedensordnungen
• Holding: A 2 b (Verfassung u.a.) Reichsstädtische Urkunden und Akten (Bde. 7 u. 20)

Contributors, Places and Time

• Date of creation: 1340 August 24, an sant Bartholomeus tag

Further information

• Other object pages: Show object in "Archivportal-D"
• Last update: 20.03.2025, 11:14 AM CET